Sir 41

1 О смерте, коль горька твоя есть память человеку мирно во имениих своих живущу, 2 мужеви не пекущуся и благополучну во всех, и еще возмогающу прияти пищу. 3 О, смерте, добр суд твой есть человеку требующему и умаляющуся крепостию, 4 в последней старости сущему и пекущуся о всех, и неверствующу и погубившу терпение. 5 Не бойся суда смерти: помяни первая твоя и последняя, сей бо суд от Господа всяцей плоти. 6 И почто отмещешися благоволения Вышняго? Аще десять, аще сто, аще тысяща лет, 7 несть во аде обличения живота. 8 Чада бывают мерзка чада грешников, и живущая в селениих нечестивых: 9 чад грешных погибнет наследие, и с семенем их выну поношение. 10 Отца нечестива укорят чада, яко его ради поношение приимут. 11 Горе вам, мужие нечестивии, иже остависте закон Бога Вышняго: 12 и аще родитеся, на клятву родитеся: и аще умрете, в клятву разделени будете. 13 Вся, елика от земли, в землю пойдут: такожде нечестивии от клятвы в пагубу. 14 Сетование человеков в телесех их: имя же грешников неблагое потребится. 15 Пецыся о имени, то бо ти пребывает паче тысящ великих сокровищ злата. 16 Благаго жития число дний, и доброе имя во веки пребывает. 17 Наказание в мире соблюдите, чада: премудрость же сокровенна и сокровище неявленно, кая польза во обоих? 18 Лучше человек скрываяй буйство свое, нежели человек скрываяй премудрость свою. 19 Темже убо усрамитеся словес моих: 20 несть бо благо всяк срам сохраняти, и не вся всем в вере благоволятся. 21 Стыдитеся пред отцем и материю о блуде и пред сильным и властелином о лжи, 22 пред судиею и князем о согрешении, пред собором и людьми о беззаконии, 23 пред общником и другом о неправде, и на месте, идеже живеши, о татьбе, 24 и пред истиною Божиею и заветом, и от опертия лактей на трапезе, от прельщения взятия и даяния, 25 и от целующих о молчании, от видения жены блудницы и от отвращения сроднича лица, 26 от отятия части и даяния и от присмотрения жены мужаты и от обольщения рабыни своея, 27 и не приступи ко одру ея: 28 пред други о словесех поносных, и по даянии не поноси: 29 от повторения и слова слышания и от откровения словес тайных: и будеши стыдлив истинно и обретаяй благодать пред всяким человеком.